na kar shumar ki har shai gini nahin jati

na kar shumār ki har shai ginī nahīñ jaatī

ye zindagī hai hisāboñ se jī nahīñ jaatī

ye narm lahja ye rañgīni-e-bayāñ ye ḳhulūs

magar laḌā.ī to aise laḌī nahīñ jaatī

sulagte din meñ thī bāhar badan meñ shab ko rahī

bichhaḌ ke mujh se bas ik tīrgī nahīñ jaatī

naqāb Daal do jalte udaas sūraj par

añdhere jism meñ kyuuñ raushnī nahīñ jaatī

har ek raah sulagte hue manāzir haiñ

magar ye baat kisī se kahī nahīñ jaatī

machalte paanī meñ ūñchā.ī kī talāsh fuzūl

pahāḌ par to koī bhī nadī nahīñ jaatī

na kar shumar ki har shai gini nahin jati

ye zindagi hai hisabon se ji nahin jati

ye narm lahja ye rangini-e-bayan ye KHulus

magar laDai to aise laDi nahin jati

sulagte din mein thi bahar badan mein shab ko rahi

bichhaD ke mujh se bas ek tirgi nahin jati

naqab Dal do jalte udas suraj par

andhere jism mein kyun raushni nahin jati

har ek rah sulagte hue manazir hain

magar ye baat kisi se kahi nahin jati

machalte pani mein unchai ki talash fuzul

pahaD par to koi bhi nadi nahin jati