na kashti hai na fikr-e-na-KHuda hai

na kashtī hai na fikr-e-nā-ḳhudā hai

dil-e-tūfāñ-talab kā aasrā hai

ilāhī ḳhair nāmūs-e-vafā kī

unheñ bhī fikr-e-nāmūs-e-vafā hai

subuk-sārān-e-sāhil jānte haiñ

dil-e-sāhil meñ kyā tūfāñ bapā hai

nahīñ ye naġhma-e-shor-e-salāsil

bahār-e-nau ke qadmoñ kī sadā hai

faroġh-e-māh kyā aur kahkashāñ kyā

ye mere māh-e-nau kī ḳhāk-e-pā hai

zamāne kī ġhulāmī ham-nafas kyuuñ

zamāna aadmī kī ḳhāk-e-pā hai

shikāyat-hā-e-soz-e-tishnagī kyuuñ

abhī 'sāġhar' dar-e-mai-ḳhāna-vā hai

na kashti hai na fikr-e-na-KHuda hai

dil-e-tufan-talab ka aasra hai

ilahi KHair namus-e-wafa ki

unhen bhi fikr-e-namus-e-wafa hai

subuk-saran-e-sahil jaante hain

dil-e-sahil mein kya tufan bapa hai

nahin ye naghma-e-shor-e-salasil

bahaar-e-nau ke qadmon ki sada hai

farogh-e-mah kya aur kahkashan kya

ye mere mah-e-nau ki KHak-e-pa hai

zamane ki ghulami ham-nafas kyun

zamana aadmi ki KHak-e-pa hai

shikayat-ha-e-soz-e-tishnagi kyun

abhi 'saghar' dar-e-mai-KHana-wa hai