na KHaksar chale aur na kaj-kulah chale

na ḳhāksār chale aur na kaj-kulāh chale

chale to shaan se ham sū-e-qatl-gāh chale

ab aur koī shahīd-e-vafā uThe na uThe

ham apnī zaat se rasm-e-vafā nibāh chale

koī to ham-safar-e-manzil-e-murād bane

jo sub.h-e-nūr nahīñ to shab-e-siyāh chale

kuchh aisī raah nikālo ki is añdhere meñ

hamāre saath bhī vo bint-e-mehr-o-māh chale

jabīn-e-shauq jhukāne ko husn ke dar par

hai kuchh to baat ki ham aise kaj-kulāh chale

ye merā dil hai hadaf aur bhī banāo ise

nahīñ jo tiir to ab dashna-e-nigāh chale

tilism-e-husn-o-mohabbat ko bhī sabāt nahīñ

jahāñ talak ho hasīnoñ se rasm-o-rāh chale

quyūd-o-band kā aur mai-kashī kā saath nahīñ

chale to daur-e-mai-o-jām be-panāh chale

jo bandagān-e-havas the vo ruk ga.e 'parvāz'

jo sarfarosh the vo sū-e-qatl-gāh chale

na KHaksar chale aur na kaj-kulah chale

chale to shan se hum su-e-qatl-gah chale

ab aur koi shahid-e-wafa uThe na uThe

hum apni zat se rasm-e-wafa nibah chale

koi to ham-safar-e-manzil-e-murad bane

jo subh-e-nur nahin to shab-e-siyah chale

kuchh aisi rah nikalo ki is andhere mein

hamare sath bhi wo bint-e-mehr-o-mah chale

jabin-e-shauq jhukane ko husn ke dar par

hai kuchh to baat ki hum aise kaj-kulah chale

ye mera dil hai hadaf aur bhi banao ise

nahin jo tir to ab dashna-e-nigah chale

tilism-e-husn-o-mohabbat ko bhi sabaat nahin

jahan talak ho hasinon se rasm-o-rah chale

quyud-o-band ka aur mai-kashi ka sath nahin

chale to daur-e-mai-o-jam be-panah chale

jo bandagan-e-hawas the wo ruk gae 'parwaz'

jo sarfarosh the wo su-e-qatl-gah chale