na KHalwat ras aati hai na hum mahfil mein rahte hain

na ḳhalvat raas aatī hai na ham mahfil meñ rahte haiñ

ye āḳhir kaun chhup-chhup kar hamāre dil meñ rahte haiñ

ghuTan be-tābiyāñ āThoñ pahar kī be-dilī aa.heñ

lagā kar tum se dil ham kis qadar mushkil meñ rahte haiñ

hamāre ham-nashīnoñ meñ tumhīñ ho raunaq-e-mahfil

ye baaqī qumqume haiñ zīnat-e-mahfil meñ rahte haiñ

ye shahr-e-husn hai ahl-e-junūñ kī baat rahne do

yahāñ to sāda-dil bhī narġha-e-qātil meñ rahte haiñ

junūñ chāk-e-garebāñ sar pe bāñdhe ḳhuun ugaltā hai

muġhīlānān-e-lailā.ī paḌe mahmil meñ rahte haiñ

jo palkoñ tak chale aate haiñ lekin bah nahīñ paate

vo aañsū dard ke sāñche meñ Dhal kar dil meñ rahte haiñ

harīf-e-mauj-e-dariyā sab haiñ lekin dekhnā ye hai

bhañvar meñ kitne kitne gosha-e-sāhil meñ rahte haiñ

mah-e-tābāñ haiñ ham tābindagī rag-rag meñ hai phir bhī

sitāroñ kī nikaltī Dūbtī jhilmil meñ rahte haiñ

yahāñ jādū-bayāñ kahte haiñ ahl-e-harf ko 'nāsir'

hunar vaale hamesha jehd-e-lā-hāsil meñ rahte haiñ

na KHalwat ras aati hai na hum mahfil mein rahte hain

ye aaKHir kaun chhup-chhup kar hamare dil mein rahte hain

ghuTan be-tabiyan aaThon pahar ki be-dili aahen

laga kar tum se dil hum kis qadar mushkil mein rahte hain

hamare ham-nashinon mein tumhin ho raunaq-e-mahfil

ye baqi qumqume hain zinat-e-mahfil mein rahte hain

ye shahr-e-husn hai ahl-e-junun ki baat rahne do

yahan to sada-dil bhi nargha-e-qatil mein rahte hain

junun chaak-e-gareban sar pe bandhe KHun ugalta hai

mughilanan-e-lailai paDe mahmil mein rahte hain

jo palkon tak chale aate hain lekin bah nahin pate

wo aansu dard ke sanche mein Dhal kar dil mein rahte hain

harif-e-mauj-e-dariya sab hain lekin dekhna ye hai

bhanwar mein kitne kitne gosha-e-sahil mein rahte hain

mah-e-taban hain hum tabindagi rag-rag mein hai phir bhi

sitaron ki nikalti Dubti jhilmil mein rahte hain

yahan jadu-bayan kahte hain ahl-e-harf ko 'nasir'

hunar wale hamesha jehd-e-la-hasil mein rahte hain