na kisi jin se na haiwan se Dar lagta hai

na kisī jin se na haivān se Dar lagtā hai

aaj ke daur meñ insān se Dar lagtā hai

roz marne kī ḳhabar aatī hai rab ke ghar se

ab to masjid ke har elaan se Dar lagtā hai

ai ḳhudāyā mirī āñkhoñ ko samundar kar de

shahr vāloñ ko bayābān se Dar lagtā hai

ham ko allāh ke bandoñ se koī ḳhauf nahīñ

ham ko kāfir se musalmān se Dar lagtā hai

mutma.in huuñ ki mirā saath nibhāoge magar

duur ho jaane ke imkān se Dar lagtā hai

phir na rishta koī aaya ho javāñ beTī kā

ghar meñ aate hue mehmān se Dar lagtā hai

mujh ko āzād karo mujh ko bikharnā hai 'razā'

maiñ vo gul huuñ jise gul-dān se Dar lagtā hai

na kisi jin se na haiwan se Dar lagta hai

aaj ke daur mein insan se Dar lagta hai

roz marne ki KHabar aati hai rab ke ghar se

ab to masjid ke har elan se Dar lagta hai

ai KHudaya meri aankhon ko samundar kar de

shahr walon ko bayaban se Dar lagta hai

hum ko allah ke bandon se koi KHauf nahin

hum ko kafir se musalman se Dar lagta hai

mutmain hun ki mera sath nibhaoge magar

dur ho jaane ke imkan se Dar lagta hai

phir na rishta koi aaya ho jawan beTi ka

ghar mein aate hue mehman se Dar lagta hai

mujh ko aazad karo mujh ko bikharna hai 'raza'

main wo gul hun jise gul-dan se Dar lagta hai