na kisi mein nazar aai ye karamat mujhko

na kisī meñ nazar aa.ī ye karāmat mujh ko

varna kyoñ sauñpte duniyā kī imāmat mujh ko

ek muddat se mujhe DhūñD rahe the ahbāb

ab milā huuñ to na chhoḌeñge salāmat mujh ko

tū agar merā ḳhudā hai to mire paas bhī aa

duur aflāk se de aur sadā mat mujh ko

in azāboñ se baḌā aur kahāñ koī azaab

sahl lagtā hai bahut ḳhauf-e-qayāmat mujh ko

roz dhartī vahī dekhūñ vahī gardūñ dekhūñ

zahr lagtī hai ye aalam kī qadāmat mujh ko

jaane kyoñ baiThne detā nahīñ 'sābir' hargiz

ek be-nām sā ehsās-e-nadāmat mujh ko

na kisi mein nazar aai ye karamat mujh ko

warna kyon saunpte duniya ki imamat mujh ko

ek muddat se mujhe DhunD rahe the ahbab

ab mila hun to na chhoDenge salamat mujh ko

tu agar mera KHuda hai to mere pas bhi aa

dur aflak se de aur sada mat mujh ko

in azabon se baDa aur kahan koi azab

sahl lagta hai bahut KHauf-e-qayamat mujh ko

roz dharti wahi dekhun wahi gardun dekhun

zahr lagti hai ye aalam ki qadamat mujh ko

jaane kyon baiThne deta nahin 'sabir' hargiz

ek be-nam sa ehsas-e-nadamat mujh ko