na koi aarzu jis mein ho wo ujDa hua dil hun

na koī aarzū jis meñ ho vo ujḌā huā dil huuñ

ġharaz be-kār huuñ ik dam jalā dene ke qābil huuñ

tujhe ulfat adū kī hai adū ko terī ulfat hai

na ab tū mere qābil hai na ab maiñ tere qābil huuñ

mujhe āsāñ na samjho apnī chaukhaT se uThā denā

baḌī mushkil se jo Taltī hai ai jaañ maiñ vo mushkil huuñ

siyah-baḳhtī meñ bhī maiñ ne vo rañg apnā jamāyā hai

kisī kī aañkh meñ kājal kisī ke gaal par til huuñ

adū par zulm dhāte ho na us ko qatl karte ho

usī par hai tumheñ da.avā ki zālim huuñ maiñ qātil huuñ

halāvat se adū ko aur mujhe talḳhī se farmāyā

tumheñ qand-e-mukarrar hoñ tumheñ zahr-e-halāhil huuñ

nahīñ mumkin tamannā-e-mulāqāt un se bar aa.e

ki vo anjān haiñ ai hazrat-e-'sābir' maiñ an-mil huuñ

na koi aarzu jis mein ho wo ujDa hua dil hun

gharaz be-kar hun ek dam jala dene ke qabil hun

tujhe ulfat adu ki hai adu ko teri ulfat hai

na ab tu mere qabil hai na ab main tere qabil hun

mujhe aasan na samjho apni chaukhaT se uTha dena

baDi mushkil se jo Talti hai ai jaan main wo mushkil hun

siyah-baKHti mein bhi main ne wo rang apna jamaya hai

kisi ki aankh mein kajal kisi ke gal par til hun

adu par zulm dhate ho na us ko qatl karte ho

usi par hai tumhein dawa ki zalim hun main qatil hun

halawat se adu ko aur mujhe talKHi se farmaya

tumhein qand-e-mukarrar hon tumhein zahr-e-halahil hun

nahin mumkin tamanna-e-mulaqat un se bar aae

ki wo anjaan hain ai hazrat-e-'sabir' main an-mil hun