na koi KHwab hamare hain na tabiren hain

na koī ḳhvāb hamāre haiñ na ta.abīreñ haiñ

ham to paanī pe banā.ī huī tasvīreñ haiñ

kyā ḳhabar kab kisī insān pe chhat aan gire

qarya-e-sañg hai aur kāñch kī tāmīreñ haiñ

luT ga.e muft meñ donoñ, tirī daulat mirā dil

ai saḳhī! terī mirī ek sī taqdīreñ haiñ

ham jo nā-ḳhvāñda nahīñ haiñ to chalo aao paḌheñ

vo jo dīvār pe likkhī huī tahrīreñ haiñ

ho na ho ye koī sach bolne vaalā hai 'qatīl'

jis ke hāthoñ meñ qalam paañv meñ zanjīreñ haiñ

na koi KHwab hamare hain na tabiren hain

hum to pani pe banai hui taswiren hain

kya KHabar kab kisi insan pe chhat aan gire

qarya-e-sang hai aur kanch ki tamiren hain

luT gae muft mein donon, teri daulat mera dil

ai saKHi! teri meri ek si taqdiren hain

hum jo na-KHwanda nahin hain to chalo aao paDhen

wo jo diwar pe likkhi hui tahriren hain

ho na ho ye koi sach bolne wala hai 'qatil'

jis ke hathon mein qalam panw mein zanjiren hain