na koi mamnua dana khana na KHauf dil mein utarna tha

na koī mamnuā daana khānā na ḳhauf dil meñ utārnā thā

jo ham ne pahlā gunah kiyā thā kisī kī naqleñ utārnā thā

jadīd duniyā meñ aane vāloñ kī pahlī muDbheḌ ham se hotī

hamāre unit kā kaam un ke badan se mohreñ utārnā thā

ḳhudā na hotā to kārvān-e-jahāñ meñ apnī jagah na bantī

ki in dinoñ meñ hamārā pesha safar meñ nazreñ utārnā thā

ham aise lafzoñ ke kārīgar the ki manDiyoñ meñ hamārā Thekā

shu.ūr-e-kuza-garī kī ḳhātir varaq pe shakleñ utārnā thā

hamāre logoñ ne bāhamī mashvare se mil kar bujhā diye the

vo diip jin ke hasab nasab meñ zamīñ pe sub.heñ utārnā thā

hamārī ghaḌiyoñ pe shaam hone meñ pāñch bajne meñ din paḌe the

so ham ko chhuTTī se pahle ḳhud ko kisī lahad meñ utārnā thā

kisī ke lahje kī chaaT aisī lagī ki apnā shi.ār 'ārish'

mukālme ke junūñ meñ ḳhud par udaas nazmeñ utārnā thā

na koi mamnua dana khana na KHauf dil mein utarna tha

jo hum ne pahla gunah kiya tha kisi ki naqlen utarna tha

jadid duniya mein aane walon ki pahli muDbheD hum se hoti

hamare unit ka kaam un ke badan se mohren utarna tha

KHuda na hota to karwan-e-jahan mein apni jagah na banti

ki in dinon mein hamara pesha safar mein nazren utarna tha

hum aise lafzon ke karigar the ki manDiyon mein hamara Theka

shuur-e-kuza-gari ki KHatir waraq pe shaklen utarna tha

hamare logon ne bahami mashware se mil kar bujha diye the

wo dip jin ke hasab nasab mein zamin pe subhen utarna tha

hamari ghaDiyon pe sham hone mein panch bajne mein din paDe the

so hum ko chhuTTi se pahle KHud ko kisi lahad mein utarna tha

kisi ke lahje ki chaT aisi lagi ki apna shiar 'arish'

mukalme ke junun mein KHud par udas nazmen utarna tha