na koi monis-o-hamdam na koi yawar tha

na koī monis-o-hamdam na koī yāvar thā

rafīq-e-ġham jo mirā thā to qalb-e-muztar thā

kisī ke husn-e-fusūñ-gar meñ ye bhī jauhar thā

ki ab vo mom huā hai kabhī jo patthar thā

tumhāre ishq ne fikr-o-nazar ko vus.at dī

rah-e-hayāt meñ chalnā to varna dūbhar thā

abas ḳhulūs-o-muravvat ko tum ne chhoḌ diyā

urūs-e-zīst kā logo yahī to zevar thā

ye taaj tāj-mahal ishq kī badaulat hai

vagarna ye to faqat qasr-e-sang-e-marmar thā

tumhārā naam hī merā rafīq-e-jāñ Thahrā

tumhārā ġham hī mirī zindagī kā mehvar thā

isī sabab to maiñ kal shab huā thā nam-dīda

mirī nazar meñ tirī ruḳhsatī kā manzar thā

nigāh-e-ahl-e-ḳhirad meñ na jis kī qīmat thī

nigāh-e-ahl-e-junūñ meñ vo sab se behtar thā

mujhe bhī manzil-e-maqsūd mil ga.ī 'sājid'

har ik qadam pe mirā azm merā rahbar thā

na koi monis-o-hamdam na koi yawar tha

rafiq-e-gham jo mera tha to qalb-e-muztar tha

kisi ke husn-e-fusun-gar mein ye bhi jauhar tha

ki ab wo mom hua hai kabhi jo patthar tha

tumhaare ishq ne fikr-o-nazar ko wusat di

rah-e-hayat mein chalna to warna dubhar tha

abas KHulus-o-murawwat ko tum ne chhoD diya

urus-e-zist ka logo yahi to zewar tha

ye taj taj-mahal ishq ki badaulat hai

wagarna ye to faqat qasr-e-sang-e-marmar tha

tumhaara nam hi mera rafiq-e-jaan Thahra

tumhaara gham hi meri zindagi ka mehwar tha

isi sabab to main kal shab hua tha nam-dida

meri nazar mein teri ruKHsati ka manzar tha

nigah-e-ahl-e-KHirad mein na jis ki qimat thi

nigah-e-ahl-e-junun mein wo sab se behtar tha

mujhe bhi manzil-e-maqsud mil gai 'sajid'

har ek qadam pe mera azm mera rahbar tha