na koī naġhma huuñ na sāz-e-ḳhush-navā huuñ maiñ
shikast-e-shīsha-e-dil kī magar sadā huuñ maiñ
vo jalva-bār haiñ jis samt dekhtā huuñ maiñ
tajalliyāt-e-mohabbat meñ ghir gayā huuñ maiñ
nigāh-e-yās mirī tarjumān-e-dil kyoñ ho
ḳhud ārzū-e-mujassam banā huā huuñ maiñ
bahār-e-husn-o-shabāb-e-bahār yā-allāh
bas ik nigāh-e-sarāpā banā huā huuñ maiñ
tamām ruuh khiñch aa.ī hai donoñ āñkhoñ meñ
ye kaun sāmne hai kis ko dekhtā huuñ maiñ
harīm-e-husn se ye kaun hai tajallī-rez
tamām hairat-e-jalva banā huā huuñ maiñ
ḳhayāl-e-husn-o-sharāb-e-sarishk-o-naġhma-e-dard
nashāt-o-rang mujassam banā huā huuñ maiñ
ye kaun jalva-numā hai ki aaj phir sar-e-bazm
sharāb-e-husn nigāhoñ se pī rahā huuñ maiñ
ye kis ne chheḌ diyā sāz-e-zindagī 'anvar'
tamām naġhma-o-fariyād ban gayā huuñ maiñ
na koi naghma hun na saz-e-KHush-nawa hun main
shikast-e-shisha-e-dil ki magar sada hun main
wo jalwa-bar hain jis samt dekhta hun main
tajalliyat-e-mohabbat mein ghir gaya hun main
nigah-e-yas meri tarjuman-e-dil kyon ho
KHud aarzu-e-mujassam bana hua hun main
bahaar-e-husn-o-shabab-e-bahaar ya-allah
bas ek nigah-e-sarapa bana hua hun main
tamam ruh khinch aai hai donon aankhon mein
ye kaun samne hai kis ko dekhta hun main
harim-e-husn se ye kaun hai tajalli-rez
tamam hairat-e-jalwa bana hua hun main
KHayal-e-husn-o-sharab-e-sarishk-o-naghma-e-dard
nashat-o-rang mujassam bana hua hun main
ye kaun jalwa-numa hai ki aaj phir sar-e-bazm
sharab-e-husn nigahon se pi raha hun main
ye kis ne chheD diya saz-e-zindagi 'anwar'
tamam naghma-o-fariyaad ban gaya hun main
Source:
Hadees-e-Dil (Pg. 62)
-
Author:
S. Nooruddin Anwar Bhopali
-
- Publisher: S. Nooruddin Anwar Bhopali
- Year of Publication: 1995
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.