na koi rabt ba-juz KHamushi o nafrat ke

na koī rabt ba-juz ḳhāmushī o nafrat ke

mileñge ab to ḳhulāse yahī mohabbat ke

maiñ qaid-e-jism meñ rusvā tū qaid meñ merī

badan pe daaġh liye qaid-e-be-sa.ūbat ke

ajiib baat girebāñ pe haath un kā hai

jo tosha-gīr-e-tamannā the harf-e-ġhairat ke

bas ab to harf-e-nadāmat ko sabt-e-dā.em de

sabā-sifat the risāle ġham-e-mohabbat ke

duā se tazkiya-e-nafas tak safar hai bahut

libās badloge kitne bhī ab zarūrat ke

siyah safed ke mālik ko farq-e-rañg se kyā

paḌe na us pe bhī sadme kabhī hazīmat ke

zamām-e-kār-e-jahāñ kis ke haath hai yā-rab

badal ga.e haiñ taqāze bhī ādmiyat ke

zamāna darpa-e-āzār hai to kyā 'nāhīd'

bikharte aa.e haiñ motī sadā mashaqqat ke

na koi rabt ba-juz KHamushi o nafrat ke

milenge ab to KHulase yahi mohabbat ke

main qaid-e-jism mein ruswa tu qaid mein meri

badan pe dagh liye qaid-e-be-saubat ke

ajib baat gireban pe hath un ka hai

jo tosha-gir-e-tamanna the harf-e-ghairat ke

bas ab to harf-e-nadamat ko sabt-e-daem de

saba-sifat the risale gham-e-mohabbat ke

dua se tazkiya-e-nafas tak safar hai bahut

libas badloge kitne bhi ab zarurat ke

siyah safed ke malik ko farq-e-rang se kya

paDe na us pe bhi sadme kabhi hazimat ke

zamam-e-kar-e-jahan kis ke hath hai ya-rab

badal gae hain taqaze bhi aadmiyat ke

zamana darpa-e-azar hai to kya 'nahid'

bikharte aae hain moti sada mashaqqat ke