na koi shakl hi ubhri na koi KHaka bana

na koī shakl hī ubhrī na koī ḳhāka banā

tamām she'roñ se kāġhaz kā ik pulanda banā

na kūza-gar ne hameñ chaak se utārā kabhī

na kūza-gar se hamārā kabhī sarāpā banā

mujhe banāne kī jab tū ne Thaan hī lī hai

koī miTā na sake ab ke mujh ko aisā banā

agar vo māntā merī to hukm detā maiñ

burī banī hai ye duniyā ise dubāra banā

mirā tamāsha kisī aur kā na thā mohtāj

maiñ aap 'qais' banā thā maiñ aap lailā banā

dayār-e-she'r-o-suḳhan meñ rahā maiñ thoḌī der

kahe kuchh achchhe bure she'r aur chaltā banā

na koi shakl hi ubhri na koi KHaka bana

tamam she'ron se kaghaz ka ek pulanda bana

na kuza-gar ne hamein chaak se utara kabhi

na kuza-gar se hamara kabhi sarapa bana

mujhe banane ki jab tu ne Than hi li hai

koi miTa na sake ab ke mujh ko aisa bana

agar wo manta meri to hukm deta main

buri bani hai ye duniya ise dubara bana

mera tamasha kisi aur ka na tha mohtaj

main aap 'qais' bana tha main aap laila bana

dayar-e-she'r-o-suKHan mein raha main thoDi der

kahe kuchh achchhe bure she'r aur chalta bana