na koi un ke siwa aur jaan-e-jaan dekha

na koī un ke sivā aur jān-e-jāñ dekhā

vahī vahī nazar aa.egā jahāñ jahāñ dekhā

bahisht meñ bhī usī huur ko ravāñ dekhā

yahāñ jo dekh chuke the vahī vahāñ dekhā

ḳhizān-e-umr kujā o kujā bahār-e-shabāb

falak ko rashk huā koī jab javāñ dekhā

ga.e jahān se jo log do jahāñ se ga.e

kisī ne phir na kabhī apnā kārvāñ dekhā

jalāyā bazm meñ har roz sham.a ke mānind

hazāroñ bāteñ sunā.īñ jo be-zabāñ dekhā

qayāmat aa.ī ye taḌpā firāq meñ ai 'barq'

na phir zamīn ko paayā na āsmāñ dekhā

na koi un ke siwa aur jaan-e-jaan dekha

wahi wahi nazar aaega jahan jahan dekha

bahisht mein bhi usi hur ko rawan dekha

yahan jo dekh chuke the wahi wahan dekha

KHizan-e-umr kuja o kuja bahaar-e-shabab

falak ko rashk hua koi jab jawan dekha

gae jahan se jo log do jahan se gae

kisi ne phir na kabhi apna karwan dekha

jalaya bazm mein har roz shama ke manind

hazaron baaten sunain jo be-zaban dekha

qayamat aai ye taDpa firaq mein ai 'barq'

na phir zamin ko paya na aasman dekha