na meri zat na lahja hi motabar mera

na merī zaat na lahja hī mo'tabar merā

matā'-e-jāñ jo bachī bas ye thā hunar merā

‘azāb-e-jān samajhtā agar mohabbat ko

to intizār na kartā vo 'umr bhar merā

vo TūTtī huī sāñseñ vo habs kā 'ālam

ye lag rahā thā huā ḳhatm ab safar merā

ta'alluqāt na the jab bahut sukūn se thā

rulā gayā vo mujhe haal pūchh kar merā

hamārī aapsī ranjish kā ye huā anjām

na tere shāne salāmat rahe na sar merā

tamām 'umr maiñ jis ke liye udaas rahā

liyā na naam kabhī us ne bhuul kar merā

'qamar' maiñ ḳhāna-ba-doshoñ ke misl phirtā huuñ

zamāna guzrā yahīñ par kahīñ thā ghar merā

na meri zat na lahja hi mo'tabar mera

mata'-e-jaan jo bachi bas ye tha hunar mera

‘azab-e-jaan samajhta agar mohabbat ko

to intizar na karta wo 'umr bhar mera

wo TuTti hui sansen wo habs ka 'alam

ye lag raha tha hua KHatm ab safar mera

ta'alluqat na the jab bahut sukun se tha

rula gaya wo mujhe haal puchh kar mera

hamari aapsi ranjish ka ye hua anjam

na tere shane salamat rahe na sar mera

tamam 'umr main jis ke liye udas raha

liya na nam kabhi us ne bhul kar mera

'qamar' main KHana-ba-doshon ke misl phirta hun

zamana guzra yahin par kahin tha ghar mera