na mujhe rok saka aap ka darban koi

na mujhe rok sakā aap kā darbāñ koī

khīñchtā thā koī dāman to garebāñ koī

sunñe vaalā nahīñ jab hāl-e-pareshāñ koī

to kahe kis liye apnā ġham-e-pinhāñ koī

husn par apne sar-e-bazm hai nāzāñ koī

sūrat-e-ā.ina hai dekh ke hairāñ koī

ātish-e-husn kā ruḳh par ye dhuāñ hai jis ko

ḳhat samajhtā hai koī zulf-e-pareshāñ koī

shaam se ye jo sañvarte haiñ tumhāre gesū

jam.a-ḳhātir koī hogā to pareshāñ koī

dekh kar ālam-e-vahshat meñ mirī hairānī

koī ḳhandāñ hai to angusht-ba-dandāñ koī

sū-e-dar aaj ye kyoñ aañkh lagī hai 'sābir'

muntazir kis ke ho kyā aa.egā mehmāñ koī

na mujhe rok saka aap ka darban koi

khinchta tha koi daman to gareban koi

sunne wala nahin jab haal-e-pareshan koi

to kahe kis liye apna gham-e-pinhan koi

husn par apne sar-e-bazm hai nazan koi

surat-e-aina hai dekh ke hairan koi

aatish-e-husn ka ruKH par ye dhuan hai jis ko

KHat samajhta hai koi zulf-e-pareshan koi

sham se ye jo sanwarte hain tumhaare gesu

jama-KHatir koi hoga to pareshan koi

dekh kar aalam-e-wahshat mein meri hairani

koi KHandan hai to angusht-ba-dandan koi

su-e-dar aaj ye kyon aankh lagi hai 'sabir'

muntazir kis ke ho kya aaega mehman koi