na pas aata hai wo aur na dur jata hai

na paas aatā hai vo aur na duur jaatā hai

'ajab tarah se mirī tishnagī baḌhātā hai

ye kaisī aag hai jis meñ koī tapish na dhuāñ

ye kaisā rabt hai jo fāsle baḌhātā hai

talāsh hai use kho.e hue ujāloñ kī

jo merī raah meñ aksar diye jalātā hai

samajh chukā huuñ maiñ us ke dukhoñ kā har andāz

jo baat baat pe merī hañsī uḌātā hai

maiñ paḌh sakā na kabhī jis ke jism kī tahrīr

hai us kā 'aks jo she'roñ meñ jhilmilātā hai

chhupā sakā na mah-o-sāl kā ġhubār use

vo ek lamha jo har lamha yaad aatā hai

na pas aata hai wo aur na dur jata hai

'ajab tarah se meri tishnagi baDhata hai

ye kaisi aag hai jis mein koi tapish na dhuan

ye kaisa rabt hai jo fasle baDhata hai

talash hai use khoe hue ujalon ki

jo meri rah mein aksar diye jalata hai

samajh chuka hun main us ke dukhon ka har andaz

jo baat baat pe meri hansi uData hai

main paDh saka na kabhi jis ke jism ki tahrir

hai us ka 'aks jo she'ron mein jhilmilata hai

chhupa saka na mah-o-sal ka ghubar use

wo ek lamha jo har lamha yaad aata hai