na pahunch saka zamana mere haal tak na pahunche

na pahuñch sakā zamāna mire haal tak na pahuñche

maiñ vahāñ huuñ jāda-paimā ki ḳhayāl tak na pahuñche

jinheñ tujh ko dekhnā ho vo mirī nazar se dekheñ

ḳhad-o-ḳhāl meñ jo uljhe vo jamāl tak na pahuñche

mirā intizār-e-va.ada tirā e'tibār-e-fardā

shab-o-roz rafta rafta mah-o-sāl tak na pahuñche

jinheñ terī aarzū thī jinheñ terī justujū thī

kisī daam meñ na aa.e kisī jaal tak na pahuñche

mire dil kī dhaḌkanoñ meñ haiñ inhīñ kī āhaTeñ sī

mujhe jin se ye gila thā mire haal tak na pahuñche

mire roz-o-shab kā aalam na samajh sakeñge 'rāhī'

jo zavāl se na guzre jo kamāl tak na pahuñche

na pahunch saka zamana mere haal tak na pahunche

main wahan hun jada-paima ki KHayal tak na pahunche

jinhen tujh ko dekhna ho wo meri nazar se dekhen

KHad-o-KHal mein jo uljhe wo jamal tak na pahunche

mera intizar-e-wada tera e'tibar-e-farda

shab-o-roz rafta rafta mah-o-sal tak na pahunche

jinhen teri aarzu thi jinhen teri justuju thi

kisi dam mein na aae kisi jal tak na pahunche

mere dil ki dhaDkanon mein hain inhin ki aahaTen si

mujhe jin se ye gila tha mere haal tak na pahunche

mere roz-o-shab ka aalam na samajh sakenge 'rahi'

jo zawal se na guzre jo kamal tak na pahunche