na puchh ai mere gham-KHwar kya tamanna thi

na pūchh ai mire ġham-ḳhvār kyā tamannā thī

dil-e-hazīñ meñ bhī ābād ek duniyā thī

har ik nazar thī hamāre hī chāk-dāmāñ par

har ek sā.at-e-ġham jaise ik tamāshā thī

hameñ bhī ab dar o dīvār ghar ke yaad aa.e

jo ghar meñ the to hameñ ārzū-e-sahrā thī

koī bachātā hameñ phir bhī Duub hī jaate

hamāre vāste zanjīr mauj-e-dariyā thī

baġhair samt ke chalnā bhī kaam aa hī gayā

fasīl-e-shahr ke bāhar bhī ek duniyā thī

tilism-e-hosh-rubā the vo manzar-e-hastī

fazā-e-dīda-o-dil jaise ḳhvāb aasā thī

koī rafīq-e-safar thā na rāhbar koī

junūñ kī raah meñ 'gulnār' jāda-paimā thī

na puchh ai mere gham-KHwar kya tamanna thi

dil-e-hazin mein bhi aabaad ek duniya thi

har ek nazar thi hamare hi chaak-daman par

har ek saat-e-gham jaise ek tamasha thi

hamein bhi ab dar o diwar ghar ke yaad aae

jo ghar mein the to hamein aarzu-e-sahra thi

koi bachata hamein phir bhi Dub hi jate

hamare waste zanjir mauj-e-dariya thi

baghair samt ke chalna bhi kaam aa hi gaya

fasil-e-shahr ke bahar bhi ek duniya thi

tilism-e-hosh-ruba the wo manzar-e-hasti

faza-e-dida-o-dil jaise KHwab aasa thi

koi rafiq-e-safar tha na rahbar koi

junun ki rah mein 'gulnar' jada-paima thi