na puchh humse hamari uDan chhoD na yar

na pūchh ham se hamārī uḌaan chhoḌ na yaar

baḌī tavīl hai ye dāstān chhoḌ na yaar

nikal paḌe jo safar meñ to sochnā kaisā

kahāñ hai dhuup kahāñ sā.ebān chhoḌ na yaar

dabī hai aag jo dil meñ use kuredo mat

yahīñ kahīñ thā hamārā makān chhoḌ na yaar

ye soch ham ko pahuñchnā hai apnī manzil tak

na gin kisī ke qadam ke nishān chhoḌ na yaar

ḳhushī thī muul to ġham thā byaaj ke jaisā

tamām umr bharā hai lagān chhoḌ na yaar

huā hai zindagī bhar kī jugāḌ roTī kā

bikī hai qistoñ meñ apnī dukān chhoḌ na yaar

libās sunnatī hai ummatī mohammadī huuñ

na pūchh ab ye nasab ḳhāndān chhoḌ na yaar

ye sab bulandiyāñ allāh ke liye haiñ 'chāñd'

maqām martaba rutba ye shaan chhoḌ na yaar

na puchh hum se hamari uDan chhoD na yar

baDi tawil hai ye dastan chhoD na yar

nikal paDe jo safar mein to sochna kaisa

kahan hai dhup kahan saeban chhoD na yar

dabi hai aag jo dil mein use kuredo mat

yahin kahin tha hamara makan chhoD na yar

ye soch hum ko pahunchna hai apni manzil tak

na gin kisi ke qadam ke nishan chhoD na yar

KHushi thi mul to gham tha byaj ke jaisa

tamam umr bhara hai lagan chhoD na yar

hua hai zindagi bhar ki jugaD roTi ka

biki hai qiston mein apni dukan chhoD na yar

libas sunnati hai ummati mohammadi hun

na puchh ab ye nasab KHandan chhoD na yar

ye sab bulandiyan allah ke liye hain 'chand'

maqam martaba rutba ye shan chhoD na yar