na puchho kaise shab-e-intizar guzri hai

na pūchho kaise shab-e-intizār guzrī hai

bhalā ho dil kā bahut be-qarār guzrī hai

hazār maslihateñ jis meñ kār-farmā hoñ

vo ik nigāh-e-karam ham pe baar guzrī hai

hai istilāh-e-mohabbat meñ jis kā naam junūñ

vo ek rasm baḌī pā.edār guzrī hai

zarūr us ne tire pairahan ko chūmā thā

jo is taraf se sabā mushk-bār guzrī hai

vo bāġhbāñ bhī koī bāġhbāñ hai jis kī hayāt

rahīn-e-minnat-e-fasl-e-bahār guzrī he

luTā hai kaun ġharīb-ud-dayār raste meñ

ye kis ke ġham meñ sabā sogvār guzrī hai

nisār us pe huuñ maiñ jis kī zindagī 'sāqī'

bashar ke auj kī ā.īna-dār guzrī hai

na puchho kaise shab-e-intizar guzri hai

bhala ho dil ka bahut be-qarar guzri hai

hazar maslihaten jis mein kar-farma hon

wo ek nigah-e-karam hum pe bar guzri hai

hai istilah-e-mohabbat mein jis ka nam junun

wo ek rasm baDi paedar guzri hai

zarur us ne tere pairahan ko chuma tha

jo is taraf se saba mushk-bar guzri hai

wo baghban bhi koi baghban hai jis ki hayat

rahin-e-minnat-e-fasl-e-bahaar guzri he

luTa hai kaun gharib-ud-dayar raste mein

ye kis ke gham mein saba sogwar guzri hai

nisar us pe hun main jis ki zindagi 'saqi'

bashar ke auj ki aaina-dar guzri hai