na qarib-o-dur ki baat kar na fareb-e-rah-guzar mein aa

na qarīb-o-dūr kī baat kar na fareb-e-rāh-guzar meñ aa

tū nigār-e-sub.h se bach ke chal na tilism-e-shab ke asar meñ aa

ye niyāz-o-nāz ke silsile ye umīd-o-bīm ke marhale

na kisī nazar se kalām kar na fasād-e-husn-e-nazar meñ aa

maiñ tirī talāsh meñ bārhā sar-e-lā-makāñ se guzar gayā

tujhe lā-makāñ kī hai justujū mire jism-o-jāñ ke khañDar meñ aa

maiñ huuñ shahr-e-ḳhvāb kā kūza-gar mujhe apne jism kī ḳhaak de

tujhe chāk-e-jāñ pe nikhār duuñ kabhī mere dast-e-hunar meñ aa

tū hai husn-o-'ishq kā naġhma-gar tū jahān-e-nau kā payāmbar

tujhe yaad karte haiñ bām-o-dar are be-ḳhabar mire ghar meñ aa

mirā najd-e-shauq hai jāñ-balab ye furāt-e-jism hai tishna-lab

kisī naqsh-e-pā ko ḳhabar na ho tū hudūd-e-gard-e-safar meñ aa

tū hai ik shabīh-e-haram-numā maiñ shikast-e-shīsha kī huuñ sadā

had-e-māsivā se guzar ke tū kabhī merī hadd-e-nazar meñ aa

ye gulū-e-ḳhushk ye regzār ye surḳh buuñd sī titliyāñ

maiñ kanār-e-āb huuñ ḳhema-zan mirī ḳhvāhishoñ ke nagar meñ aa

kisī dasht-e-barf-misāl meñ mirī aarzū bhī hai munjamid

mire māh-o-sāl pe kar nazar tū hisār-e-raqs-e-sharar meñ aa

abhī abr-e-barq-farosh bhī mire ḳhār-o-ḳhas se hai be-ḳhabar

ye 'muzaffar' apnī hai an-kahī ki tū dard ban ke jigar meñ aa

na qarib-o-dur ki baat kar na fareb-e-rah-guzar mein aa

tu nigar-e-subh se bach ke chal na tilism-e-shab ke asar mein aa

ye niyaz-o-naz ke silsile ye umid-o-bim ke marhale

na kisi nazar se kalam kar na fasad-e-husn-e-nazar mein aa

main teri talash mein barha sar-e-la-makan se guzar gaya

tujhe la-makan ki hai justuju mere jism-o-jaan ke khanDar mein aa

main hun shahr-e-KHwab ka kuza-gar mujhe apne jism ki KHak de

tujhe chaak-e-jaan pe nikhaar dun kabhi mere dast-e-hunar mein aa

tu hai husn-o-'ishq ka naghma-gar tu jahan-e-nau ka payambar

tujhe yaad karte hain baam-o-dar are be-KHabar mere ghar mein aa

mera najd-e-shauq hai jaan-balab ye furaat-e-jism hai tishna-lab

kisi naqsh-e-pa ko KHabar na ho tu hudud-e-gard-e-safar mein aa

tu hai ek shabih-e-haram-numa main shikast-e-shisha ki hun sada

had-e-masiwa se guzar ke tu kabhi meri hadd-e-nazar mein aa

ye gulu-e-KHushk ye regzar ye surKH bund si titliyan

main kanar-e-ab hun KHema-zan meri KHwahishon ke nagar mein aa

kisi dasht-e-barf-misal mein meri aarzu bhi hai munjamid

mere mah-o-sal pe kar nazar tu hisar-e-raqs-e-sharar mein aa

abhi abr-e-barq-farosh bhi mere KHar-o-KHas se hai be-KHabar

ye 'muzaffar' apni hai an-kahi ki tu dard ban ke jigar mein aa