na rasta koi us ka na us ka KHwab koi

na rāsta koī us kā na us kā ḳhvāb koī

paḌā na ishq pe aisā kabhī azaab koī

kisī kā husn thā yuuñ āñsuoñ ke dāman meñ

charāġh jaltā ho jis tarah zer-e-āb koī

zamāne-bhar kī atāoñ meñ sirf us kā karam

karam bhī aisā ki jis kā nahīñ javāb koī

tamāzat-e-ġham-e-duniyā meñ us ko yaad kiyā

to dasht-e-dil pe barastā rahā sahāb koī

agar fasānoñ ke pīchhe koī haqīqat hai

to ḳhvāb aur bhī hogā varā-e-ḳhvāb koī

ye log bol rahe haiñ magar fazā hai ḳhamosh

hamāre ahd meñ aanā hai inqalāb koī

vo jab hujūm ke narġhe meñ aur tanhā thā

to dekhne kī thī phir us kī āb-o-tāb koī

ab us kī bazm se aa kar ḳhamosh rahtā hai

thā bārgāh meñ ik roz bāryāb koī

har ek raah se haT kar guzarte ho 'ādil'

to is tarah se milā hai kabhī janāb koī

na rasta koi us ka na us ka KHwab koi

paDa na ishq pe aisa kabhi azab koi

kisi ka husn tha yun aansuon ke daman mein

charagh jalta ho jis tarah zer-e-ab koi

zamane-bhar ki ataon mein sirf us ka karam

karam bhi aisa ki jis ka nahin jawab koi

tamazat-e-gham-e-duniya mein us ko yaad kiya

to dasht-e-dil pe barasta raha sahab koi

agar fasanon ke pichhe koi haqiqat hai

to KHwab aur bhi hoga wara-e-KHwab koi

ye log bol rahe hain magar faza hai KHamosh

hamare ahd mein aana hai inqalab koi

wo jab hujum ke narghe mein aur tanha tha

to dekhne ki thi phir us ki aab-o-tab koi

ab us ki bazm se aa kar KHamosh rahta hai

tha bargah mein ek roz baryab koi

har ek rah se haT kar guzarte ho 'adil'

to is tarah se mila hai kabhi janab koi