na rang-o-bu hai na kaif-o-naghma nazar mein bhi dilruba nahin hai

na rañg-o-bū hai na kaif-o-naġhma nazar meñ bhī dilrubā nahīñ hai

maiñ kaise samjhūñ bahār aa.ī ki ġhuncha dil kā khilā nahīñ hai

tirī mohabbat ke ḳhvāb dekhe tirī mohabbat ke giit gaa.e

terī mohabbat meñ kyā na paayā terī mohabbat meñ kyā nahīñ hai

chhupā.ūñ zaḳhmoñ ke apne dil meñ na aa.e nok-e-mizha pe aañsū

karo na rusvā yuuñ apne ġham ko ki ye to rasm-e-vafā nahīñ hai

vo sāz-e-dil jo kabhī thā chheḌā tirī nazar ne ba-nāz-o-shoḳhī

vo ab bhī naġhma-sarā hai lekin nikaltī koī sadā nahīñ hai

vo guzre vaqtoñ kī ab haiñ yādeñ sahāre jin ke maiñ jī rahā huuñ

kaho na mujh se ki un meñ kyā hai ye mujh se pūchho ki kyā nahīñ hai

na jaane terī talāsh meñ kyoñ bhaTak bhaTak kar maiñ rah gayā huuñ

vagarna har zarra-e-zamīñ par jahāñ tirā naqsh-e-pā nahīñ hai

hayāt kī shaam kaash merī tirī hī yādoñ meñ biit jaa.e

ki vaqt-e-āḳhir ye kah sakūñ maiñ ki zindagī se gilā nahīñ hai

ye buġhz-o-nafrat ke sho.ale har sū banā rahe haiñ vatan ko dozaḳh

hamīñ haiñ chup-chāp aur be-his ki jaise kuchh bhī huā nahīñ hai

mujhe zarūrat 'habīb' kyā hai charāġh-e-dair-o-haram kī āḳhir

jo dil meñ bhaḌkā thā sho.ala-e-ġham vo jal rahā hai bujhā nahīñ hai

na rang-o-bu hai na kaif-o-naghma nazar mein bhi dilruba nahin hai

main kaise samjhun bahaar aai ki ghuncha dil ka khila nahin hai

teri mohabbat ke KHwab dekhe teri mohabbat ke git gae

teri mohabbat mein kya na paya teri mohabbat mein kya nahin hai

chhupaun zaKHmon ke apne dil mein na aae nok-e-mizha pe aansu

karo na ruswa yun apne gham ko ki ye to rasm-e-wafa nahin hai

wo saz-e-dil jo kabhi tha chheDa teri nazar ne ba-naz-o-shoKHi

wo ab bhi naghma-sara hai lekin nikalti koi sada nahin hai

wo guzre waqton ki ab hain yaaden sahaare jin ke main ji raha hun

kaho na mujh se ki un mein kya hai ye mujh se puchho ki kya nahin hai

na jaane teri talash mein kyon bhaTak bhaTak kar main rah gaya hun

wagarna har zarra-e-zamin par jahan tera naqsh-e-pa nahin hai

hayat ki sham kash meri teri hi yaadon mein bit jae

ki waqt-e-aKHir ye kah sakun main ki zindagi se gila nahin hai

ye bughz-o-nafrat ke shoale har su bana rahe hain watan ko dozaKH

hamin hain chup-chap aur be-his ki jaise kuchh bhi hua nahin hai

mujhe zarurat 'habib' kya hai charagh-e-dair-o-haram ki aaKHir

jo dil mein bhaDka tha shoala-e-gham wo jal raha hai bujha nahin hai