na ruswa is tarah karte bula kar mujhko mahfil mein

na rusvā is tarah karte bulā kar mujh ko mahfil meñ

agar pās-e-vafā hotā zarā bhī aap ke dil meñ

na ab vo valvale baaqī na ab vo hausle dil meñ

mirā honā na honā ek hai duniyā kī mahfil meñ

havādis se hai nisbat ḳhaas aise zindagānī ko

hai qaa.em rabt-e-bāham jis tarah dariyā-o-sāhil meñ

baḌī muddat se ye aalam na jiitā huuñ na martā huuñ

baḌī muddat se merī zindagī hai saḳht mushkil meñ

abhī koī balā TuuTī abhī koī sitam TuuTā

rahā jab tak maiñ zinda ik yahī ḳhadsha rahā dil meñ

mirī hastī kī kashtī kā Thikānā hī nahīñ koī

abhī āġhosh-e-tūfāñ meñ abhī āġhosh-e-sāhil meñ

tumhīñ socho mirā jiinā koī jiine meñ jiinā hai

na koī aarzū dil meñ na koī mudda.ā dil meñ

safīna zindagī kā nazr-e-tūfāñ kar diyā 'āsī'

tujhe āḳhir ye kyā sūjhī ye kyā aa.ī tire dil meñ

na ruswa is tarah karte bula kar mujh ko mahfil mein

agar pas-e-wafa hota zara bhi aap ke dil mein

na ab wo walwale baqi na ab wo hausle dil mein

mera hona na hona ek hai duniya ki mahfil mein

hawadis se hai nisbat KHas aise zindagani ko

hai qaem rabt-e-baham jis tarah dariya-o-sahil mein

baDi muddat se ye aalam na jita hun na marta hun

baDi muddat se meri zindagi hai saKHt mushkil mein

abhi koi bala TuTi abhi koi sitam TuTa

raha jab tak main zinda ek yahi KHadsha raha dil mein

meri hasti ki kashti ka Thikana hi nahin koi

abhi aaghosh-e-tufan mein abhi aaghosh-e-sahil mein

tumhin socho mera jina koi jine mein jina hai

na koi aarzu dil mein na koi muddaa dil mein

safina zindagi ka nazr-e-tufan kar diya 'asi'

tujhe aaKHir ye kya sujhi ye kya aai tere dil mein