na sahi hum pe inayat nahin paimanon ki

na sahī ham pe ināyat nahīñ paimānoñ kī

khiḌkiyāñ khul ga.iiñ āñkhoñ se to mai-ḳhānoñ kī

aa nahīñ saktā samajh meñ kabhī farzānoñ kī

surḳh-rū kaise jabīneñ huiiñ dīvānoñ kī

zulf bikhrā.e sar-e-shām pareshān haiñ vo

qismateñ auj pe haiñ chāk-garebānoñ kī

dāstāñ kohkan-o-qais kī farsūda huī

surḳhiyāñ ham ne badal Daalī haiñ afsānoñ kī

āñkheñ to bhiig chukīñ aur na pyaar aa jaa.e

aur rūdād suneñ aap na dīvānoñ kī

mai-kade aane se pahle kā zamāna tauba

ḳhaak chhānī hai haram aur sanam-ḳhānoñ kī

zaḳhm-e-dil ko koī marham bhī na raas aa.egā

har gul-e-zaḳhm meñ lazzat hai namak-dānoñ kī

jaane kab nikle murādoñ kī dulhan kī Dolī

dil meñ bārāt hai Thahrī huī armānoñ kī

zaḳhm par hañste haiñ ashkoñ ko guhar kahte haiñ

aql maarī ga.ī is daur meñ insānoñ kī

kitne momin nazar aate haiñ sanam-ḳhānoñ meñ

ek kāfir nahīñ bastī meñ musalmānoñ kī

jitnī taz.hīk tire shahr meñ apnoñ kī huī

utnī tauhīn na hogī kahīñ begānoñ kī

raat baḌh baḌh ke jo sham' pe hue the sadqe

sub.h tak ḳhaak na dekhī ga.ī parvānoñ kī

haram-o-dair kī bastī meñ hai tam.īz-o-nafāq

koī tafrīq-e-milal dekhī na dīvānoñ kī

log kyuuñ shahr-e-ḳhamoshāñ ko khiñche jaate haiñ

jaane kyā jaan hai is bastī meñ be-jānoñ kī

ruḳh badalte haiñ dorāhe pe khaḌe haiñ sālār

sa.i'-e-nākām to dekhe koī nā-dānoñ kī

hāthā-chhāñTī hai 'ajab aur 'ajab lūT-khasūT

niyyateñ aur haiñ shāyad ki nigahbānoñ kī

pūchhe 'gulzār' se hai vo ba-zabān-e-sausan

tum kahāñ bazm meñ aa.e ho zabāñ-dānoñ kī

na sahi hum pe inayat nahin paimanon ki

khiDkiyan khul gain aankhon se to mai-KHanon ki

aa nahin sakta samajh mein kabhi farzanon ki

surKH-ru kaise jabinen huin diwanon ki

zulf bikhrae sar-e-sham pareshan hain wo

qismaten auj pe hain chaak-garebanon ki

dastan kohkan-o-qais ki farsuda hui

surKHiyan hum ne badal Dali hain afsanon ki

aankhen to bhig chukin aur na pyar aa jae

aur rudad sunen aap na diwanon ki

mai-kade aane se pahle ka zamana tauba

KHak chhani hai haram aur sanam-KHanon ki

zaKHm-e-dil ko koi marham bhi na ras aaega

har gul-e-zaKHm mein lazzat hai namak-danon ki

jaane kab nikle muradon ki dulhan ki Doli

dil mein baraat hai Thahri hui armanon ki

zaKHm par hanste hain ashkon ko guhar kahte hain

aql mari gai is daur mein insanon ki

kitne momin nazar aate hain sanam-KHanon mein

ek kafir nahin basti mein musalmanon ki

jitni tazhik tere shahr mein apnon ki hui

utni tauhin na hogi kahin beganon ki

raat baDh baDh ke jo sham' pe hue the sadqe

subh tak KHak na dekhi gai parwanon ki

haram-o-dair ki basti mein hai tamiz-o-nafaq

koi tafriq-e-milal dekhi na diwanon ki

log kyun shahr-e-KHamoshan ko khinche jate hain

jaane kya jaan hai is basti mein be-jaanon ki

ruKH badalte hain dorahe pe khaDe hain salar

sai'-e-nakaam to dekhe koi na-danon ki

hatha-chhanTi hai 'ajab aur 'ajab luT-khasuT

niyyaten aur hain shayad ki nigahbanon ki

puchhe 'gulzar' se hai wo ba-zaban-e-sausan

tum kahan bazm mein aae ho zaban-danon ki