na satar satar mein talash kar na ibaraton mein talash kar

na satar satar meñ talāsh kar na ibāratoñ meñ talāsh kar

jo hamārī tarah faqīr haiñ unheñ hāshiyoñ meñ talāsh kar

jinheñ bhūlnā tirā mashġhala unheñ silsiloñ meñ talāsh kar

kabhī fāsloñ se gurez kar kabhī qurbatoñ meñ talāsh kar

mujhe nā-pasand qiyām-e-dil maiñ qarār-e-jāñ ke ḳhilāf huuñ

mujhe gardishoñ kā junūn hai mujhe rāstoñ meñ talāsh kar

mire shauq se tirī justujū kā mukālima hai ye dam-ba-dam

mirā shukr tere qarīb hai mujhe ne.amatoñ meñ talāsh kar

unheñ ḳhud se thoḌā qarīb kar jo azāb-e-jāñ kā shikār haiñ

jo shikast dil ke marīz haiñ unheñ rābtoñ meñ talāsh kar

na vo raunaqeñ shab-o-roz meñ na vo razm meñ na vo bazm meñ

vo jo be-bahā hai matā-e-dil use ratjagoñ meñ talāsh kar

vo jo 'āqib'-e-tarab-āshnā thā ḳhudī meñ apnī huā hai gum

tujhe justujū hai usī kī to use āshiqoñ meñ talāsh kar

na satar satar mein talash kar na ibaraton mein talash kar

jo hamari tarah faqir hain unhen hashiyon mein talash kar

jinhen bhulna tera mashghala unhen silsilon mein talash kar

kabhi faslon se gurez kar kabhi qurbaton mein talash kar

mujhe na-pasand qiyam-e-dil main qarar-e-jaan ke KHilaf hun

mujhe gardishon ka junun hai mujhe raston mein talash kar

mere shauq se teri justuju ka mukalima hai ye dam-ba-dam

mera shukr tere qarib hai mujhe neamaton mein talash kar

unhen KHud se thoDa qarib kar jo azab-e-jaan ka shikar hain

jo shikast dil ke mariz hain unhen rabton mein talash kar

na wo raunaqen shab-o-roz mein na wo razm mein na wo bazm mein

wo jo be-baha hai mata-e-dil use ratjagon mein talash kar

wo jo 'aqib'-e-tarab-ashna tha KHudi mein apni hua hai gum

tujhe justuju hai usi ki to use aashiqon mein talash kar