na sawal hai na jawab hai na hi aur mujhko KHayal hai

na savāl hai na javāb hai na hī aur mujh ko ḳhayāl hai

tirā tazkira hī darūn-e-dil mirī zindagī kā ma.aal hai

na havas hai daulat-o-māl kī na hī taḳht kī na hī taaj kī

jo bhī mil gayā kabhī zar mujhe to mire liye hī vabāl hai

mirā kaun hai jo sivā tire kabhī merā vāqif-e-hāl ho

tū qarīb hai rag-e-jāñ se bhī tū hī jāntā hai jo haal hai

tire dar pe sar-ba-sujūd hai tire dar kā hī hai vo mo'takif

ye jabīn-e-'hamza' jo jhuk ga.ī to phir is kā uThnā muhāl hai

na sawal hai na jawab hai na hi aur mujh ko KHayal hai

tera tazkira hi darun-e-dil meri zindagi ka maal hai

na hawas hai daulat-o-mal ki na hi taKHt ki na hi taj ki

jo bhi mil gaya kabhi zar mujhe to mere liye hi wabaal hai

mera kaun hai jo siwa tere kabhi mera waqif-e-haal ho

tu qarib hai rag-e-jaan se bhi tu hi jaanta hai jo haal hai

tere dar pe sar-ba-sujud hai tere dar ka hi hai wo mo'takif

ye jabin-e-'hamza' jo jhuk gai to phir is ka uThna muhaal hai