na shar us ka na hai shamshir uski

na shar us kā na hai shamshīr us kī

lagī hai daav par taqdīr us kī

sar-e-maqtal na dīvāne ko chheḌo

sharar-angez hai zanjīr us kī

jo likh kar ho gayā ġharqāb-e-tūfāñ

ravāñ hai ret par tahrīr us kī

mahakte ḳhat haiñ murjhā.e hue gul

yahī hai paas ab jāgīr us kī

vo bijlī phuul shabnam aur sitāra

musavvir khīñch le tasvīr us kī

maiñ muḌ ke jab bhī pīchhe dekhtā huuñ

nazar aatī hai bas tanvīr us kī

maiñ yādoñ ke sahāre jī rahā huuñ

inhī yādoñ meñ hai tasvīr us kī

'razā' dekhā hai tum ne ḳhvāb shāyad

bahut mushkil hai ab ta.abīr us kī

na shar us ka na hai shamshir us ki

lagi hai daw par taqdir us ki

sar-e-maqtal na diwane ko chheDo

sharar-angez hai zanjir us ki

jo likh kar ho gaya gharqab-e-tufan

rawan hai ret par tahrir us ki

mahakte KHat hain murjhae hue gul

yahi hai pas ab jagir us ki

wo bijli phul shabnam aur sitara

musawwir khinch le taswir us ki

main muD ke jab bhi pichhe dekhta hun

nazar aati hai bas tanwir us ki

main yaadon ke sahaare ji raha hun

inhi yaadon mein hai taswir us ki

'raza' dekha hai tum ne KHwab shayad

bahut mushkil hai ab tabir us ki