na shart koi hai apni na koi sauda hai

na shart koī hai apnī na koī saudā hai

hamāre saath agar tum chalo to achchhā hai

lagī hai aag kahīñ yā charāġh jalte haiñ

yahāñ se duur jo dekheñ to kuchh ujālā hai

hamāre haal pe aañsū haiñ us kī āñkhoñ meñ

magar ḳhayāl sā hotā hai ye bhī dhokā hai

gayā to sadma nahīñ thā gumāñ bhī toḌ gayā

hameñ gumān yahī thā ki vo hamārā hai

bichhaḌ ke tujh se nahīñ ham ko ranj-e-tanhā.ī

hamāre saath to ab vahshatoñ kā melā hai

agar mile to kabhī us se pūchhnā 'ādil'

hameñ batāo koī yaad tum ko aatā hai

na shart koi hai apni na koi sauda hai

hamare sath agar tum chalo to achchha hai

lagi hai aag kahin ya charagh jalte hain

yahan se dur jo dekhen to kuchh ujala hai

hamare haal pe aansu hain us ki aankhon mein

magar KHayal sa hota hai ye bhi dhoka hai

gaya to sadma nahin tha guman bhi toD gaya

hamein guman yahi tha ki wo hamara hai

bichhaD ke tujh se nahin hum ko ranj-e-tanhai

hamare sath to ab wahshaton ka mela hai

agar mile to kabhi us se puchhna 'adil'

hamein batao koi yaad tum ko aata hai