na sirf tujhse mujhe intiqam lena hai

na sirf tujh se mujhe intiqām lenā hai

hisāb-e-vahshat-e-umr-e-tamām lenā hai

mire laboñ pe ye rakh dī ga.ī hai kis kī duā

ye saarī umr mujhe kis kā naam lenā hai

sunā hai us kī nigāheñ adab-navāz haiñ so

kisī bhī tarah mujhe ik salām lenā hai

maiñ ik faqīr-e-mohabbat huuñ mujh ko kyā mālūm

ki kis suḳhan pe mujhe kitnā daam lenā hai

bas ek tū hī nahīñ hai mire nishāne par

zamāne bhar se mujhe intiqām lenā hai

abhī to baaqī haiñ duniyā ke rañj bhī aage

abhī to dil se mujhe aur kaam lenā hai

na sirf tujh se mujhe intiqam lena hai

hisab-e-wahshat-e-umr-e-tamam lena hai

mere labon pe ye rakh di gai hai kis ki dua

ye sari umr mujhe kis ka nam lena hai

suna hai us ki nigahen adab-nawaz hain so

kisi bhi tarah mujhe ek salam lena hai

main ek faqir-e-mohabbat hun mujh ko kya malum

ki kis suKHan pe mujhe kitna dam lena hai

bas ek tu hi nahin hai mere nishane par

zamane bhar se mujhe intiqam lena hai

abhi to baqi hain duniya ke ranj bhi aage

abhi to dil se mujhe aur kaam lena hai