na sitara na hi hum shams-o-qamar chahte hain

na sitāra na hī ham shams-o-qamar chāhte haiñ

ham daraḳhtoñ se faqat shāḳh-o-samar chāhte haiñ

na zamīñ chāhte haiñ aur na zar chāhte haiñ

ham faqīrān-e-ḳhudā ek hī dar chāhte haiñ

dasht-o-dariyā ke amiiñ bhī to haiñ āvāra nasīb

sā.ebāñ koī bhī ho apnā hī ghar chāhte haiñ

muntaqil apnī nadāmat na karo ġhairoñ tak

tajraba ham bhī kahāñ bār-e-digar chāhte haiñ

shīsha-o-chob ke dānoñ se na bahleñge kabhī

daur-e-hāzir ke ye bachche to guhar chāhte haiñ

mansab-o-jāh haqīqat meñ haiñ mohtājī-e-dil

sochiye ḳhuub ye kyā ilm-o-hunar chāhte haiñ

bin bulā.e hī musāfir ye chale aa.e the

vasvase aap se ab izn-e-safar chāhte haiñ

tum to aḳhbār sunāte ho jahāñ ke 'rāhī'

ham ki darvesh haiñ bātin kī ḳhabar chāhte haiñ

na sitara na hi hum shams-o-qamar chahte hain

hum daraKHton se faqat shaKH-o-samar chahte hain

na zamin chahte hain aur na zar chahte hain

hum faqiran-e-KHuda ek hi dar chahte hain

dasht-o-dariya ke amin bhi to hain aawara nasib

saeban koi bhi ho apna hi ghar chahte hain

muntaqil apni nadamat na karo ghairon tak

tajraba hum bhi kahan bar-e-digar chahte hain

shisha-o-chob ke danon se na bahlenge kabhi

daur-e-hazir ke ye bachche to guhar chahte hain

mansab-o-jah haqiqat mein hain mohtaji-e-dil

sochiye KHub ye kya ilm-o-hunar chahte hain

bin bulae hi musafir ye chale aae the

waswase aap se ab izn-e-safar chahte hain

tum to aKHbar sunate ho jahan ke 'rahi'

hum ki darwesh hain baatin ki KHabar chahte hain