na sochna ki zamane se Dar gae hum bhi

na sochnā ki zamāne se Dar ga.e ham bhī

tirī talāsh meñ ġhairoñ ke ghar ga.e ham bhī

churā liiñ ham se bhī us ḳhud-parast ne āñkheñ

dil-e-habīb se āḳhir agar ga.e ham bhī

pasījā dil na kisī kā hamāre ashkoñ se

har āstāñ pe liye chashm-e-tar ga.e ham bhī

jo dekhā kaliyoñ ko tujh par nisār hote hue

to rañg ban ke fazā meñ bikhar ga.e ham bhī

jab us kī zauq-e-nazar kā huā bahut charchā

vufūr-e-shauq se ek din sañvar ga.e ham bhī

bahut se ishq kī rāhoñ meñ pul-sirāt aa.e

tumhārā naam liyā aur guzar ga.e ham bhī

muhāl thā ki ham ai 'josh' zinda rah sakte

firāq-e-yār meñ ik roz mar ga.e ham bhī

na sochna ki zamane se Dar gae hum bhi

teri talash mein ghairon ke ghar gae hum bhi

chura lin hum se bhi us KHud-parast ne aankhen

dil-e-habib se aaKHir agar gae hum bhi

pasija dil na kisi ka hamare ashkon se

har aastan pe liye chashm-e-tar gae hum bhi

jo dekha kaliyon ko tujh par nisar hote hue

to rang ban ke faza mein bikhar gae hum bhi

jab us ki zauq-e-nazar ka hua bahut charcha

wufur-e-shauq se ek din sanwar gae hum bhi

bahut se ishq ki rahon mein pul-siraat aae

tumhaara nam liya aur guzar gae hum bhi

muhaal tha ki hum ai 'josh' zinda rah sakte

firaq-e-yar mein ek roz mar gae hum bhi