na sud hai na ziyan hasil-e-wafa kya hai

na suud hai na ziyāñ hāsil-e-vafā kyā hai

vafā-parast na maiñ huuñ na vo burā kyā hai

koī kisī ko batātā nahīñ huā kyā hai

chalo unhīñ se ye pūchheñ ki mājrā kyā hai

vahī hai ruuh vahī jism kuchh nahīñ badlā

ḳhayāl meñ nahīñ aatā ki phir nayā kyā hai

maiñ apne aap se māyūs to nahīñ lekin

jo aks hī na dikhā.e vo ā.īna kyā hai

mirā vajūd sarāpā javāb hai kis kā

nahīñ savāl to phir ye savāl sā kyā hai

kise qubūl karūñ kis ko an-sunā kar duuñ

ye aatī jaatī sadāoñ kā silsila kyā hai

na ḳhud milegā na mujh ko kabhī bulā.egā

is aane jaane meñ vaise bhī ab rahā kyā hai

vo mere paas bhī hai mehrbāñ bhī hai mujh par

faqat ḳhayāl hai merā ḳhayāl kā kyā hai

na sud hai na ziyan hasil-e-wafa kya hai

wafa-parast na main hun na wo bura kya hai

koi kisi ko batata nahin hua kya hai

chalo unhin se ye puchhen ki majra kya hai

wahi hai ruh wahi jism kuchh nahin badla

KHayal mein nahin aata ki phir naya kya hai

main apne aap se mayus to nahin lekin

jo aks hi na dikhae wo aaina kya hai

mera wajud sarapa jawab hai kis ka

nahin sawal to phir ye sawal sa kya hai

kise qubul karun kis ko an-suna kar dun

ye aati jati sadaon ka silsila kya hai

na KHud milega na mujh ko kabhi bulaega

is aane jaane mein waise bhi ab raha kya hai

wo mere pas bhi hai mehrban bhi hai mujh par

faqat KHayal hai mera KHayal ka kya hai