na tarz-e-KHas na andaz-e-gul-fishan le kar

na tarz-e-ḳhās na andāz-e-gul-fishāñ le kar

pukārtā huuñ maiñ tujh ko tirī zabāñ le kar

tamām husn-e-tamannā dhuāñ dhuāñ le kar

nigāh bujh hī ga.ī raat kā samāñ le kar

mirī bahār-e-tamannā ko jāvedāñ kar de

maiñ kyā karūñgā bhalā umr-e-rā.egāñ le kar

tumhāre bazm kā dastūr chāhe jo bhī ho

tumhārī bazm meñ aayā huuñ maiñ zabāñ le kar

ab aur kitnā tamāsha banā.egī qismat

phirūñ maiñ apnā janāza kahāñ kahāñ le kar

mujhe hī raas na aa.ī ye bad-nasīb zabāñ

to kyā karoge miyāñ tum mirī zabāñ le kar

ye pastiyoñ kī lakīreñ na chhū sakeñgī mujhe

maiñ ghar se niklā huuñ āñkhoñ meñ āsmāñ le kar

suhāg jis kī judā.ī meñ ujḌā ujḌā hai

kabhī to lauTegā sone kī chūḌiyāñ le kar

tumhārā aa.ina kaise na ehtirām kare

mirī ġhazal bhī to aa.ī hai kahkashāñ le kar

ḳhirad kī resham-o-atlas-navāz mahfil meñ

junūñ chalā hai garebāñ kī dhajjiyāñ le kar

mizāj bachchoñ ke jaisā hai ab bhī 'qaisar' kā

bahut hī ḳhush hai vo kāġhaz kī titliyāñ le kar

na tarz-e-KHas na andaz-e-gul-fishan le kar

pukarta hun main tujh ko teri zaban le kar

tamam husn-e-tamanna dhuan dhuan le kar

nigah bujh hi gai raat ka saman le kar

meri bahaar-e-tamanna ko jawedan kar de

main kya karunga bhala umr-e-raegan le kar

tumhaare bazm ka dastur chahe jo bhi ho

tumhaari bazm mein aaya hun main zaban le kar

ab aur kitna tamasha banaegi qismat

phirun main apna janaza kahan kahan le kar

mujhe hi ras na aai ye bad-nasib zaban

to kya karoge miyan tum meri zaban le kar

ye pastiyon ki lakiren na chhu sakengi mujhe

main ghar se nikla hun aankhon mein aasman le kar

suhag jis ki judai mein ujDa ujDa hai

kabhi to lauTega sone ki chuDiyan le kar

tumhaara aaina kaise na ehtiram kare

meri ghazal bhi to aai hai kahkashan le kar

KHirad ki resham-o-atlas-nawaz mahfil mein

junun chala hai gareban ki dhajjiyan le kar

mizaj bachchon ke jaisa hai ab bhi 'qaisar' ka

bahut hi KHush hai wo kaghaz ki titliyan le kar