na tirgi ke liye hun na raushni ke liye

na tīrgī ke liye huuñ na raushnī ke liye

sitāra-e-saharī huuñ maiñ zindagī ke liye

ye kaun vaqt kī sūrat mujhe badaltā hai

ye kyā kisī ke liye kuchh huuñ kuchh kisī ke liye

sarāb-e-ḳhvāb kī ta.abīr jū-e-āb sahī

maiñ sochtā huuñ magar dasht-e-tishnagī ke liye

vo mutma.in huuñ gumāñ ko yaqīñ samajhtā huuñ

yaqīñ ki ḳhud nahīñ kuchh kam jo gumrahī ke liye

kahīñ vo merī tarah merā āshnā hī na ho

hazār ḳhvāb bunūñ maiñ jis ajnabī ke liye

vo āsmāñ ho ki sahrā vajūd ho ki adam

fazā banī hai ye kis sharh-e-ḳhāmushī ke liye

na tirgi ke liye hun na raushni ke liye

sitara-e-sahari hun main zindagi ke liye

ye kaun waqt ki surat mujhe badalta hai

ye kya kisi ke liye kuchh hun kuchh kisi ke liye

sarab-e-KHwab ki tabir ju-e-ab sahi

main sochta hun magar dasht-e-tishnagi ke liye

wo mutmain hun guman ko yaqin samajhta hun

yaqin ki KHud nahin kuchh kam jo gumrahi ke liye

kahin wo meri tarah mera aashna hi na ho

hazar KHwab bunun main jis ajnabi ke liye

wo aasman ho ki sahra wajud ho ki adam

faza bani hai ye kis sharh-e-KHamushi ke liye