na ulTi usne mahfil mein naqab awwal se aaKHir tak

na ulTī us ne mahfil meñ naqāb avval se āḳhir tak

rahī phir bhī tajallī-e-barq-e-tāb avval se āḳhir tak

uThātā huuñ nazar jab jānib-e-aflāk mastī meñ

to uTh jaate haiñ ye sātoñ hijāb avval se āḳhir tak

vo ā.eñge nahīñ aa.e ḳhat aa.egā nahīñ aayā

ġhalat niklī mirī tābīr-e-ḳhvāb avval se āḳhir tak

huī har baar merī bāriyoñ par bhuul saaqī ko

mujhe ḳhālī diyā jām-e-sharāb avval se āḳhir tak

gino donoñ tarah apne mazālim Thiik niklegā

shumār āḳhir se avval tak hisāb avval se āḳhir tak

jo qisse hai shigāf-e-sīna-e-ḳhud-chāk ke lab par

ba-gosh-e-chashm sun leñ āñ-janāb avval se āḳhir tak

kahīñ umr-e-ravāñ dam-bhar Thaharne ko nahīñ ruktī

rahā kartī hai ye pā dar-rikāb avval se āḳhir tak

kitāb-e-ishq paḌhnī chāhiye tujh ko bhī ai nāseh

baḌā dilchasp hai ek ek baab avval se āḳhir tak

shab-e-sard-e-zamistāñ kī tarah afsurda afsurda

guzartā hai ġharīboñ kā shabāb avval se āḳhir tak

guloñ ke darmiyāñ shor-e-fuġhāñ kartī rahī bulbul

na chauñkā ek bhī ġhaflat ma.aab avval se āḳhir tak

kināre paar kar ke sust ho jaatā hai dariyā bhī

kise rahtā hai yaksāñ iztirāb avval se āḳhir tak

bahut jhiḌkā bahut DāñTā bahut tambīh kī mujh ko

bahut pur-lutf thā un kā ḳhitāb avval se āḳhir tak

gunāhoñ hī gunāhoñ meñ kaTī hai zindagī merī

yahī maiñ ne kamā.e haiñ savāb avval se āḳhir tak

ta.ajjub hai ki maiñ jāñ-soḳhta zinda rahā kyuuñ kar

judā.ī thī jahannum kā azaab avval se āḳhir tak

ye achchhā hī huā ham kāmyāb qurb hone meñ

ba-har-sūrat rahe nā-kāmyāb avval se āḳhir tak

hayāt-afroz thī un kī javānī jin shahīdoñ ne

lagā.e na.ara-hā-e-inqalāb avval se āḳhir tak

jise be-misl andāz-e-suḳhan ho dekhnā 'anvar'

paḌhe merā kalām-e-lā-javāb avval se āḳhir tak

na ulTi us ne mahfil mein naqab awwal se aaKHir tak

rahi phir bhi tajalli-e-barq-e-tab awwal se aaKHir tak

uThata hun nazar jab jaanib-e-aflak masti mein

to uTh jate hain ye saton hijab awwal se aaKHir tak

wo aaenge nahin aae KHat aaega nahin aaya

ghalat nikli meri tabir-e-KHwab awwal se aaKHir tak

hui har bar meri bariyon par bhul saqi ko

mujhe KHali diya jam-e-sharab awwal se aaKHir tak

gino donon tarah apne mazalim Thik niklega

shumar aaKHir se awwal tak hisab awwal se aaKHir tak

jo qisse hai shigaf-e-sina-e-KHud-chaak ke lab par

ba-gosh-e-chashm sun len aan-janab awwal se aaKHir tak

kahin umr-e-rawan dam-bhar Thaharne ko nahin rukti

raha karti hai ye pa dar-rikab awwal se aaKHir tak

kitab-e-ishq paDhni chahiye tujh ko bhi ai naseh

baDa dilchasp hai ek ek bab awwal se aaKHir tak

shab-e-sard-e-zamistan ki tarah afsurda afsurda

guzarta hai gharibon ka shabab awwal se aaKHir tak

gulon ke darmiyan shor-e-fughan karti rahi bulbul

na chaunka ek bhi ghaflat maab awwal se aaKHir tak

kinare par kar ke sust ho jata hai dariya bhi

kise rahta hai yaksan iztirab awwal se aaKHir tak

bahut jhiDka bahut DanTa bahut tambih ki mujh ko

bahut pur-lutf tha un ka KHitab awwal se aaKHir tak

gunahon hi gunahon mein kaTi hai zindagi meri

yahi main ne kamae hain sawab awwal se aaKHir tak

tajjub hai ki main jaan-soKHta zinda raha kyun kar

judai thi jahannum ka azab awwal se aaKHir tak

ye achchha hi hua hum kaamyab qurb hone mein

ba-har-surat rahe na-kaamyab awwal se aaKHir tak

hayat-afroz thi un ki jawani jin shahidon ne

lagae nara-ha-e-inqalab awwal se aaKHir tak

jise be-misl andaz-e-suKHan ho dekhna 'anwar'

paDhe mera kalam-e-la-jawab awwal se aaKHir tak