na wapsi hai jahan se wahan hain sab ke sab

na vāpsī hai jahāñ se vahāñ haiñ sab ke sab

zamīñ pe rah ke zamīñ par kahāñ haiñ sab ke sab

koī bhī ab to kisī ke muḳhālifat meñ nahīñ

ab ek dūsre ke rāzdāñ haiñ sab ke sab

qadam qadam pe añdhere savāl karte haiñ

ye kaise nuur kā tarz-e-bayāñ haiñ sab ke sab

vo bolte haiñ magar bat rakh nahīñ paate

zabān rakhte hai par be-zabāñ haiñ sab ke sab

suī ke girne kī aahaT se guuñj uThte haiñ

giraft-e-khauf meñ ḳhālī makāñ haiñ sab ke sab

jhukā.e sar jo khaḌe haiñ ḳhilāf zulmoñ ke

lagā hai aisā 'dvij' be-zabāñ haiñ sab ke sab

na wapsi hai jahan se wahan hain sab ke sab

zamin pe rah ke zamin par kahan hain sab ke sab

koi bhi ab to kisi ke muKHalifat mein nahin

ab ek dusre ke raazdan hain sab ke sab

qadam qadam pe andhere sawal karte hain

ye kaise nur ka tarz-e-bayan hain sab ke sab

wo bolte hain magar bat rakh nahin pate

zaban rakhte hai par be-zaban hain sab ke sab

sui ke girne ki aahaT se gunj uThte hain

giraft-e-khauf mein KHali makan hain sab ke sab

jhukae sar jo khaDe hain KHilaf zulmon ke

laga hai aisa 'dwij' be-zaban hain sab ke sab