na ye puchho guzar kar had se diwanon pe kya guzri

na ye pūchho guzar kar had se dīvānoñ pe kyā guzrī

junūñ se jā ke ye pūchho ki vīrānoñ pe kyā guzrī

manāyā jashn bhī kaisā ye bole TuuT kar sāġhar

tumhārī vahshatoñ se aaj paimānoñ pe kyā guzrī

thī gul-poshī chaman vaalo ki gul-chīnī kā pāgal-pan

tumhārī in adāoñ se gulistānoñ pe kyā guzrī

havā.eñ lauT kar aa.eñ to gum-sum haiñ batā.eñ kyā

ki pardesoñ meñ rah kar aam insānoñ pe kyā guzrī

kiyā jo faisla tum ne bahut āsāñ use samjhā

na kyoñ sochā hamāre dil ke armānoñ pe kyā guzrī

hameñ kis ne bulāyā thā tirī mahfil meñ ai duniyā

bulā kar phir nahīñ dekhā ki mehmānoñ pe kyā guzrī

tavajjoh par tumhārī 'rāg' likkhī dāstāñ ham ne

kiyā tum ne taġhāful jab to afsānoñ pe kyā guzrī

na ye puchho guzar kar had se diwanon pe kya guzri

junun se ja ke ye puchho ki viranon pe kya guzri

manaya jashn bhi kaisa ye bole TuT kar saghar

tumhaari wahshaton se aaj paimanon pe kya guzri

thi gul-poshi chaman walo ki gul-chini ka pagal-pan

tumhaari in adaon se gulistanon pe kya guzri

hawaen lauT kar aaen to gum-sum hain bataen kya

ki pardeson mein rah kar aam insanon pe kya guzri

kiya jo faisla tum ne bahut aasan use samjha

na kyon socha hamare dil ke armanon pe kya guzri

hamein kis ne bulaya tha teri mahfil mein ai duniya

bula kar phir nahin dekha ki mehmanon pe kya guzri

tawajjoh par tumhaari 'rag' likkhi dastan hum ne

kiya tum ne taghaful jab to afsanon pe kya guzri