na ye qarib hain duniya ke aur na din ke pas

na ye qarīb haiñ duniyā ke aur na diin ke paas

ye mere dost haiñ rahte haiñ āstīn ke paas

vo log bhī hameñ shak kī nazar se dekhte haiñ

jo ek vaqt meñ hote haiñ tiin tiin ke paas

lo ek mujh sā gunahgār aur aa pahuñchā

bahut sā kaam to pahle se thā zamīn ke paas

vo bevafā hai magar kis tarah bhulā deñ use

hamārā dil bhī to lagtā hai us kamīn ke paas

agar haiñ sīkhnā ādāb-e-zindagī tum ko

guzāro vaqt kisī boriyā-nashīn ke paas

hamārī zaat kahīñ us meñ gum na ho jaa.e

ham is liye nahīñ jaate haiñ us zahīn ke paas

ye daad aap ko lahje kī mil rahī hai miyāñ

hamāre sher pahuñchte haiñ sāma.īn ke paas

gunāhgār haiñ lekin ka.ī havāloñ se

sifārish apnī ga.ī rabb-e-ālamīn ke paas

mirī ravish se mujhe kis tarah haTānā hai

yahī to kaam hai mere muḳhālifīn ke paas

na ye qarib hain duniya ke aur na din ke pas

ye mere dost hain rahte hain aastin ke pas

wo log bhi hamein shak ki nazar se dekhte hain

jo ek waqt mein hote hain tin tin ke pas

lo ek mujh sa gunahgar aur aa pahuncha

bahut sa kaam to pahle se tha zamin ke pas

wo bewafa hai magar kis tarah bhula den use

hamara dil bhi to lagta hai us kamin ke pas

agar hain sikhna aadab-e-zindagi tum ko

guzaro waqt kisi boriya-nashin ke pas

hamari zat kahin us mein gum na ho jae

hum is liye nahin jate hain us zahin ke pas

ye dad aap ko lahje ki mil rahi hai miyan

hamare sher pahunchte hain samain ke pas

gunahgar hain lekin kai hawalon se

sifarish apni gai rabb-e-alamin ke pas

meri rawish se mujhe kis tarah haTana hai

yahi to kaam hai mere muKHalifin ke pas