na ye zamin thi jab aasman kahin nahin tha

na ye zamīn thī jab āsmāñ kahīñ nahīñ thā

faqat yaqīn thā har-sū gumāñ kahīñ nahīñ thā

lagī thī bastī meñ ġhurbat kī aag bhī kaisī

ki log jal bhī rahe the dhuāñ kahīñ nahīñ thā

mirī kitāb meñ merī hī zindagī thī magar

mirā hī naam sar-e-dāstāñ kahīñ nahīñ thā

musāfiroñ ko vahāñ kaun pūchhtā ki jahāñ

the mehmān sabhī mezbāñ kahīñ nahīñ thā

shafaq meñ bikhre hue the ġham-e-hayāt ke rang

ḳhushī kā rāh-e-talab meñ nishāñ kahīñ nahīñ thā

bas ek dasht thī hadd-e-nigāh tak duniyā

jo aarzū meñ thā vo gulsitāñ kahīñ nahīñ thā

lipaT ke royā thā vaqt-e-safar jo ham se 'hinā'

ham aa.e ghar to vahī mehrbāñ kahīñ nahīñ thā

na ye zamin thi jab aasman kahin nahin tha

faqat yaqin tha har-su guman kahin nahin tha

lagi thi basti mein ghurbat ki aag bhi kaisi

ki log jal bhi rahe the dhuan kahin nahin tha

meri kitab mein meri hi zindagi thi magar

mera hi nam sar-e-dastan kahin nahin tha

musafiron ko wahan kaun puchhta ki jahan

the mehman sabhi mezban kahin nahin tha

shafaq mein bikhre hue the gham-e-hayat ke rang

KHushi ka rah-e-talab mein nishan kahin nahin tha

bas ek dasht thi hadd-e-nigah tak duniya

jo aarzu mein tha wo gulsitan kahin nahin tha

lipaT ke roya tha waqt-e-safar jo hum se 'hina'

hum aae ghar to wahi mehrban kahin nahin tha