na-ashna-e-dard-e-dil-e-be-qarar log

nā-āshnā-e-dard-e-dil-e-be-qarār log

kyā jāneñ ābrū-e-ġham-e-intizār log

taskīn-e-dil ke vāste hote na ḳhaar log

ai kaash jānte tire ġham kā vaqār log

nazreñ bachā ke chalte haiñ begāna-vār log

ik pal meñ bhuul jaate haiñ barsoñ kā pyaar log

in ke diloñ meñ ab vo mohabbat nahīñ rahī

kitnā badal ga.e haiñ ilāhī ye yaar log

barsoñ kī rasm-o-rāh kā toḌeñ na yuuñ bharam

yuuñ be-ta.alluqī na kareñ iḳhtiyār log

har ik suḳhan hai tanz kā pahlū liye hue

badle ye kab ke lene lage mujh se yaar log

un kī tasalliyāñ na kisī kaam aa sakīñ

mujh ko bachā sake na mire ġham-gusār log

ham ne kiyā jo jaur-e-musalsal kā shukriya

apne kiye pe aap hue sharm-sār log

ik bevafā kī yaad se uljhā huā hai dil

chhoḌeñ na aaj zikr-e-ġham-e-rozgār log

aa.egī jab kabhī unheñ 'āsī' hamārī yaad

ro.eñge phuuT phuuT ke dīvāna-vār log

na-ashna-e-dard-e-dil-e-be-qarar log

kya jaanen aabru-e-gham-e-intizar log

taskin-e-dil ke waste hote na KHar log

ai kash jaante tere gham ka waqar log

nazren bacha ke chalte hain begana-war log

ek pal mein bhul jate hain barson ka pyar log

in ke dilon mein ab wo mohabbat nahin rahi

kitna badal gae hain ilahi ye yar log

barson ki rasm-o-rah ka toDen na yun bharam

yun be-talluqi na karen iKHtiyar log

har ek suKHan hai tanz ka pahlu liye hue

badle ye kab ke lene lage mujh se yar log

un ki tasalliyan na kisi kaam aa sakin

mujh ko bacha sake na mere gham-gusar log

hum ne kiya jo jaur-e-musalsal ka shukriya

apne kiye pe aap hue sharm-sar log

ek bewafa ki yaad se uljha hua hai dil

chhoDen na aaj zikr-e-gham-e-rozgar log

aaegi jab kabhi unhen 'asi' hamari yaad

roenge phuT phuT ke diwana-war log