na-azmuda harf the behaal ho gae

nā-āzmūda harf the behāl ho ga.e

sar-tā-ba-pā navishta-e-a.amāl ho ga.e

pahlā varaq ulaTne kī mohlat kahāñ milī

do hī hurūf jaan kā janjāl ho ga.e

milnā milānā shukr-o-shikāyat mohabbateñ

yaaro vo ahd-e-rafta ke ahvāl ho ga.e

niklā thā lāl-posh jazīroñ kī khoj meñ

ab ye ḳhabar bhī aa.e ka.ī saal ho ga.e

bartāv mausamoñ kā bahut munsifāna thā

raste bhī un ke saath hī pāmāl ho ga.e

piilī havā kā zor abhī kuchh ghaTā nahīñ

uḌte hue vo aa.e the be-bāl ho ga.e

vo jism kyā the barf ke paikar tamām the

maiñ ne chhuā to sā'iqa-timsāl ho ga.e

na-azmuda harf the behaal ho gae

sar-ta-ba-pa nawishta-e-amal ho gae

pahla waraq ulaTne ki mohlat kahan mili

do hi huruf jaan ka janjal ho gae

milna milana shukr-o-shikayat mohabbaten

yaro wo ahd-e-rafta ke ahwal ho gae

nikla tha lal-posh jaziron ki khoj mein

ab ye KHabar bhi aae kai sal ho gae

bartaw mausamon ka bahut munsifana tha

raste bhi un ke sath hi pamal ho gae

pili hawa ka zor abhi kuchh ghaTa nahin

uDte hue wo aae the be-baal ho gae

wo jism kya the barf ke paikar tamam the

main ne chhua to sa'iqa-timsal ho gae