na-ahl aur nikamme siwa is ke kya karen

nā-ahl aur nikamme sivā is ke kyā kareñ

baiThe har ek shaḳhs pe bas tabsira kareñ

achchhā hai aap apnī hamesha kahā kareñ

lekin kabhī kabhār mirī bhī sunā kareñ

haq baat muñh pe kahne kī aadat hai kyā kareñ

kam-zarf ham se soch-samajh kar milā kareñ

munsif vahī gavāh vahī mudda.ī vah.y

un ko hī iḳhtiyār hai jo faisla kareñ

mohsin ho chārāgar ho masīhā ho kyā ho tum

ham tum se apne dard kā kyoñ tazkira kareñ

kaafī hai apne vāste bas ik ḳhudā kī zaat

har dar pe jā ke kis liye ham iltijā kareñ

buzdil kī tarah kis liye baiThe haiñ ghaat meñ

himmat agar hai aap meñ to sāmnā kareñ

kyā ek ham hī Thahre mohabbat ke pāsdār

kyā ek ham hī saare jahāñ se vafā kareñ

sheroñ meñ dhīre dhīre zarūr aa.egā nikhār

ustād shā.iroñ ko ai 'tābish' paḌhā kareñ

na-ahl aur nikamme siwa is ke kya karen

baiThe har ek shaKHs pe bas tabsira karen

achchha hai aap apni hamesha kaha karen

lekin kabhi kabhaar meri bhi suna karen

haq baat munh pe kahne ki aadat hai kya karen

kam-zarf hum se soch-samajh kar mila karen

munsif wahi gawah wahi muddai wahy

un ko hi iKHtiyar hai jo faisla karen

mohsin ho chaaragar ho masiha ho kya ho tum

hum tum se apne dard ka kyon tazkira karen

kafi hai apne waste bas ek KHuda ki zat

har dar pe ja ke kis liye hum iltija karen

buzdil ki tarah kis liye baiThe hain ghat mein

himmat agar hai aap mein to samna karen

kya ek hum hi Thahre mohabbat ke pasdar

kya ek hum hi sare jahan se wafa karen

sheron mein dhire dhire zarur aaega nikhaar

ustad shairon ko ai 'tabish' paDha karen