na-ahl se bhule se danai na li jae

nā-ahl se bhūle se dānā.ī na lī jaa.e

dariyā se samundar kī gahrā.ī na lī jaa.e

har pal ho sanā-ḳhvānī us rabb-e-haqīqat kī

is ālam-e-irfāñ se tanhā.ī na lī jaa.e

jis bazm meñ miltā ho insāf-e-jahāñgīrī

us bazm se phir kaise achchhā.ī na lī jaa.e

jo gulshan-e-hastī ko shādāb na kar paa.e

purvā.ī ho vo phir bhī purvā.ī na lī jaa.e

taz.īn-e-taḳhayyul to hai lāzmī fankāro

auroñ se kisī sūrat goyā.ī na lī jaa.e

jo ḳhusrav-e-hastī haiñ aksar yahī kahte haiñ

sadqe meñ kisī se bhī dārā.ī na lī jaa.e

ā.īn-e-zabāñ-bandī kyā is liye nāfiz hai

bedār na ho paa.eñ añgḌā.ī na lī jaa.e

haañ sabr-o-qanā.at kā 'maqsūd' ye matlab hai

qarze kī koī shai bhī ai bhaa.ī na lī jaa.e

na-ahl se bhule se danai na li jae

dariya se samundar ki gahrai na li jae

har pal ho sana-KHwani us rabb-e-haqiqat ki

is aalam-e-irfan se tanhai na li jae

jis bazm mein milta ho insaf-e-jahangiri

us bazm se phir kaise achchhai na li jae

jo gulshan-e-hasti ko shadab na kar pae

purwai ho wo phir bhi purwai na li jae

tazin-e-taKHayyul to hai lazmi fankaro

auron se kisi surat goyai na li jae

jo KHusraw-e-hasti hain aksar yahi kahte hain

sadqe mein kisi se bhi darai na li jae

aain-e-zaban-bandi kya is liye nafiz hai

bedar na ho paen angDai na li jae

han sabr-o-qanaat ka 'maqsud' ye matlab hai

qarze ki koi shai bhi ai bhai na li jae