na-KHuda ko jab KHuda ka aasra milta nahin

nā-ḳhudā ko jab ḳhudā kā aasrā miltā nahīñ

umr bhar us ko kināroñ kā patā miltā nahīñ

azm-o-himmat ho to har ik rāsta nazroñ meñ hai

kaun sī manzil hai jis kā rāsta miltā nahīñ

hādsoñ ne ġham ke afsāne murattab kar diye

ab kitāb-e-zindagī meñ hādisa miltā nahīñ

ahl-e-bātin kī ināyat bhī zarūrī hai bahut

ahl-e-zāhir ke milā.e se ḳhudā miltā nahīñ

kuchh na kuchh apnā.iyat nazroñ meñ honī chāhiye

ajnabī nazroñ ko sūrat-āshnā miltā nahīñ

jazb sāñsoñ meñ mirī ye kaun āḳhir ho gayā

ab mirī pahchān ab merā pata miltā nahīñ

husn har ta.amīr kā qaa.em hai merī zaat meñ

maiñ vo miTTī huuñ mujhe chhāno to kyā miltā nahīñ

zindagī vaqf-e-ḳhayāl-e-dost hai apnī 'zamīr'

ab kisī goshe meñ ehsās-e-anā miltā nahīñ

na-KHuda ko jab KHuda ka aasra milta nahin

umr bhar us ko kinaron ka pata milta nahin

azm-o-himmat ho to har ek rasta nazron mein hai

kaun si manzil hai jis ka rasta milta nahin

hadson ne gham ke afsane murattab kar diye

ab kitab-e-zindagi mein hadisa milta nahin

ahl-e-baatin ki inayat bhi zaruri hai bahut

ahl-e-zahir ke milae se KHuda milta nahin

kuchh na kuchh apnaiyat nazron mein honi chahiye

ajnabi nazron ko surat-ashna milta nahin

jazb sanson mein meri ye kaun aaKHir ho gaya

ab meri pahchan ab mera pata milta nahin

husn har tamir ka qaem hai meri zat mein

main wo miTTi hun mujhe chhano to kya milta nahin

zindagi waqf-e-KHayal-e-dost hai apni 'zamir'

ab kisi goshe mein ehsas-e-ana milta nahin