na-rasai ka chalo jashn manaen hum log

nā-rasā.ī kā chalo jashn manā.eñ ham log

shāyad is tarah se kuchh kho.eñ to paa.eñ ham log

ret hī ret agar apnā muqaddar Thahrā

kyūñki phir ek gharauñdā hī banā.eñ ham log

jism kī qaid koī qaid nahīñ hotī hai

aao sab jhūTī hadeñ toḌ ke jaa.eñ ham log

is badalte hue mausam kā bharosā bhī nahīñ

giilī miTTī pe koī naqsh sajā.eñ ham log

rok pā.eñge na lamhāt ke mausam ham ko

ek dīvār zamāna to havā.eñ ham log

apne jazbāt ke pākīza tahaffuz ke liye

kabhī malbūs kabhī garm ridā.eñ ham log

koī sūraj na kisī raat ke dāman meñ girā

māñgte hī rahe sadiyoñ se duā.eñ ham log

chāñd utrā nahīñ ab tak bhī zamīñ par 'shabnam'

ek muddat huī dete haiñ sadā.eñ ham log

na-rasai ka chalo jashn manaen hum log

shayad is tarah se kuchh khoen to paen hum log

ret hi ret agar apna muqaddar Thahra

kyunki phir ek gharaunda hi banaen hum log

jism ki qaid koi qaid nahin hoti hai

aao sab jhuTi haden toD ke jaen hum log

is badalte hue mausam ka bharosa bhi nahin

gili miTTi pe koi naqsh sajaen hum log

rok paenge na lamhat ke mausam hum ko

ek diwar zamana to hawaen hum log

apne jazbaat ke pakiza tahaffuz ke liye

kabhi malbus kabhi garm ridaen hum log

koi suraj na kisi raat ke daman mein gira

mangte hi rahe sadiyon se duaen hum log

chand utra nahin ab tak bhi zamin par 'shabnam'

ek muddat hui dete hain sadaen hum log