nadaniyon ko ek naya rang de diya

nādāniyoñ ko ek nayā rang de diyā

dānista maiñ ne haath tah-e-sang de diyā

merā ḳhayāl thā ye koī nek kaam hai

maiñ ne tumhāre dard ko āhang de diyā

duniyā meñ aur mujh meñ phir ik baar Than ga.ī

fitrat ne mere haath meñ phir chang de diyā

ai zindagī bas ab mire dāman ko chhoḌ de

jab tak banā ḳhushī se tirā sang de diyā

patthar hī thā vo jis pe maiñ bikhrā thā TuuT kar

logoñ ne us ko rutba-e-aurang de diyā

'hairat' jab apnā jaadū jagāne pe aa.e haiñ

jiine ko ham ne martaba-e-jang de diyā

nadaniyon ko ek naya rang de diya

danista main ne hath tah-e-sang de diya

mera KHayal tha ye koi nek kaam hai

main ne tumhaare dard ko aahang de diya

duniya mein aur mujh mein phir ek bar Than gai

fitrat ne mere hath mein phir chang de diya

ai zindagi bas ab mere daman ko chhoD de

jab tak bana KHushi se tera sang de diya

patthar hi tha wo jis pe main bikhra tha TuT kar

logon ne us ko rutba-e-aurang de diya

'hairat' jab apna jadu jagane pe aae hain

jine ko hum ne martaba-e-jang de diya