nala-e-dil ki to kotahi nahin

nāla-e-dil kī to kotāhī nahīñ

par asar kuchh us ko hotā hī nahīñ

kitnā vo qātil hai be-ḳhauf-o-ḳhatar

teġh-e-ḳhūñ-ālūda dhotā hī nahīñ

us galī meñ jis tarah rotā huuñ maiñ

us tarah to koī rotā hī nahīñ

ḳhār-zār-e-ishq ko kyā ho gayā

paañv meñ kāñTe chubhotā hī nahīñ

tark kī lazzat se vāqif kaun haiñ

gar na hotā jaan khotā hī nahīñ

jāntā gar dil hai mazra yaas kā

tuḳhm-e-ummīd is meñ botā hī nahīñ

joñ suḳhan aatā hai silk-e-nazm meñ

yuuñ koī motī pirotā hī nahīñ

ḳhvāb meñ 'joshish' vo aa.e kis tarah

āshiq-e-be-tāb sotā hī nahīñ

nala-e-dil ki to kotahi nahin

par asar kuchh us ko hota hi nahin

kitna wo qatil hai be-KHauf-o-KHatar

tegh-e-KHun-aluda dhota hi nahin

us gali mein jis tarah rota hun main

us tarah to koi rota hi nahin

KHar-zar-e-ishq ko kya ho gaya

panw mein kanTe chubhota hi nahin

tark ki lazzat se waqif kaun hain

gar na hota jaan khota hi nahin

jaanta gar dil hai mazra yas ka

tuKHm-e-ummid is mein bota hi nahin

jon suKHan aata hai silk-e-nazm mein

yun koi moti pirota hi nahin

KHwab mein 'joshish' wo aae kis tarah

aashiq-e-be-tab sota hi nahin