nam se tere jo raushan matla-e-diwan hua

naam se tere jo raushan matla-e-dīvāñ huā

har varaq ḳhurshīd ke mānind nūr-afshāñ huā

terī hī qudrat se paidā hai zamīn-o-āsmāñ

ḳhaak kā putlā tajallī se tirī insāñ huā

tere abr-e-faiz se taaza hai bāġh-e-kā.enāt

kyā gul-e-ālam nasīm-e-fazl se ḳhandāñ huā

qadr rakhtā hai sulaimāñ se ziyāda mor bhī

jo gadā darvāze kā tere huā sultāñ huā

yaad se terī dil-e-nāshād apnā shaad hai

zikr terā mere dard-e-fikr kā darmāñ huā

sar-bulandī meñ bhī mujh ko faḳhr kī daulat milī

allāh allāh kis qadar mujh par tirā ehsāñ huā

halqa-e-sāhab-e-dilāñ meñ terā 'ahqar' naam hai

ye samajh le chaak terā nāma-e-isyāñ huā

nam se tere jo raushan matla-e-diwan hua

har waraq KHurshid ke manind nur-afshan hua

teri hi qudrat se paida hai zamin-o-asman

KHak ka putla tajalli se teri insan hua

tere abr-e-faiz se taza hai bagh-e-kaenat

kya gul-e-alam nasim-e-fazl se KHandan hua

qadr rakhta hai sulaiman se ziyaada mor bhi

jo gada darwaze ka tere hua sultan hua

yaad se teri dil-e-nashad apna shad hai

zikr tera mere dard-e-fikr ka darman hua

sar-bulandi mein bhi mujh ko faKHr ki daulat mili

allah allah kis qadar mujh par tera ehsan hua

halqa-e-sahab-e-dilan mein tera 'ahqar' nam hai

ye samajh le chaak tera nama-e-isyan hua